الشعر العربي
 
الرئيسيةالبوابةس .و .جبحـثالتسجيلدخول

شاطر | 
 

 راح اهج يمكن لروما

اذهب الى الأسفل 
كاتب الموضوعرسالة
سيف الدليمي
علاس المنتدى
علاس المنتدى
avatar

عدد الرسائل : 32
العمر : 27
الموقع : العراق
المزاج : هادئ
تاريخ التسجيل : 24/04/2008

مُساهمةموضوع: راح اهج يمكن لروما   الإثنين أبريل 28, 2008 5:55 am

راح اهج يمكن لروما
هناك أفصلي حكومه
عله كدي وبمقاسي
وانتجي ويرتاح راسي
راح أهج يمكن لروما

ليش أهج تسألني عمي ؟
أرجوك لا تبجي إعله همي
من أسولف , وأفك فمي
بشر أنه ...موش بومه !
راح أهج يمكن لروما

عمي سالفتي بسيطه
بالحلك حطولي ليطه
هالنشامه خوان زيطه (!)
مصلخ , وباكو هدومه !
راح أهج يمكن لروما

منهو ذوله ؟ صدك تسأل ؟
وإنت أفهم مني وأعقل !!
أدري تعرف , أدري تندل
تريد كلبي يكت همومه
راح أهج يمكن لروما

خوش راح أرسم الصوره
الدهر ذب عليه جوره
قسمه عميه وعيشه عوره
وليلي طفه كل نجومه !
راح أهج يمكن لروما

أمي جابتني عراقي
وكالت بهالوطن باقي
يمه جذرك جذر راقي
وكاعك الطيبه رحومه
راح أهج يمكن لروما

وأنه أحب أمي هوايه
وصدكت هاي الحجايه
كلت باقي بهالولايه
وكاعي مثلج , حضن أمومه
راح أهج يمكن لروما

قريت بالتاريخ عجبه
عدنه كلكامش وصحبه
والخليل إكتشف ربه
بكاعنه وفاضت علومه
راح أهج يمكن لروما

وعدنه أور وعدنه بابل
وعدنه أشور الآصائل
والجنائن والخمائل
تحجي أثاره ورسومه
راح أهج يمكن لروما

وشفت بالدنيه العجيبه
مرت أقوام غريبه
بهالارض , شربت حليبه
وذابت , وغطت بنومه
راح أهج يمكن لروما

وإجه هارون الرشيدْ
وخضّرت أيامه عيد
وشمخ فوك الدنيه جيد
تبغدد وعاش بنعومه
راح أهج يمكن لروما

وتالي وبغفله إجونه
تتر وأتراك أو ولونه
وماي دجله ضاع لونه
الكتب تسبح بيه تعومه
راح أهج يمكن لروما

وذاب هولاكو وجيوشه
إنهدم للعثماني حوشه
وإنكليزي نوخذ بوشه
إنفضح وإنكشفت سمومه
راح أهج يمكن لروما

وملك جبنه إستوردينه
من الحجاز ونصبينه
ويوم جيته تحزمينه
كِلنه هوسنه لقدومه
راح أهج يمكن لروما

وعشنه مثل الناس نكدحْ
نزرع ونحصد ونفلح
كاعنه , والعرك ينضح
وممتحن كلمن بيومه
راح أهج يمكن لروما

وعاشت الوادم بطيبه
وكلمن يسوكه حليبه
لاكو فتنه ولاكو غيبه
أخوال صرنه بنص عمومه
راح أهج يمكن لروما

بصفنه عليمنه خفاجي
وعله يسرانه ( ابو راجي )
صبي كل شغله التراجي
ومحبس ومعضد همومه
راح أهج يمكن لروما

وبالعجد ( حسقيل ) يمنه
وليبيع العرك عمنه
والآمامي بنص طرفنه
ما شفت فرق وخصومه
راح أهج يمكن لروما

شربت ويه الكاع طيبه
جاري إخوي وعرضه هيبه
وعيني ما كشفت عيبه
وما دنت نفسي لكرومه
راح أهج يمكن لروما

ومات فيصل وإجه غازي
حرب عظمى وجيش نازي
ونوري كل عمره إنتهازي
تصعد وتنزل سهومه
راح أهج يمكن لروما

إنكتل غازي وإجه فيصل
طفل جان , وخاله فَصّل
وصي عرش إبن إخته حَصَل
والسمه مغيمه وجهومه
راح أهج يمكن لروما

وإجت تموز المجيده
وصحنه هالقاسم نريده
صار عمنه وبسنه إيده
ولو غلط محد يلومه
راح أهج يمكن لروما

صحنه ( أوحد ) صار أوحدْ
وكلنه مامش مثله أحد
ونمنه لن شباط أسود
زخت علينه رجومه
راح أهج يمكن لروما

وصار كتل الناس عادهْ
وصارت السلطه جراده
اليزرع تفرهد حصاده
وتنهب أتعابه وتسومه
راح أهج يمكن لروما

وراح عارف وإجه عارف
وبقه دم هالشعب نازف
الجيش للأكراد قاصف
والحرب جشعه ونهومه
راح أهج يمكن لروما

وليشوف الموت يرضه
بالصخونه , ويلم بعضه
الحيه من لدغتنه عضه
ندمنه عالماضي وسقومه
راح أهج يمكن لروما

ما رضينه بزمن طاهر
يبوك كحله بعين ساهر
وحوبته جانت جسومه
راح أهج يمكن لروما

ومن جديد البعث جانه
تمَكيّج وغير لسانه
وإحنه غشمه وقشمرانه
ومَطَر إعلينه غيومه
راح أهج يمكن لروما

وعشنه وبعصر العجايب
شفنه ذله وشرف غايب
وشفنه أنذال وعكارب
ودوله مجنونه وغشومه
راح أهج يمكن لروما

شفنه أولاد الشوارع
ساسه وبأعلى المواقع
والكريم الحر ينازع
مجروّد ومبتلي بيومه
راح أهج يمكن لروما

شعب مصلوب وحزين
وينتظر هلبت معين
يحقق النه الي نرومه
راح أهج يمكن لروما

وهدت أمريكا علينه
وفلشت كلشي البنينه
وحيل ويانه من إدينه
إحنه رتبنه العزومه
راح أهج يمكن لروما

وجانه مجلس حكم غافي
عجبه سالفته , خرافي !
بريمر يقوده .. عوافي
ومنو يتجسَر يلومه ! ؟
راح أهج يمكن لروما

وصار تالي الوطن حصه
ثلثه الك , وانه لي نصه
تقاسموه , وغده غصه
بكل كلب , محترك دومه
راح أهج يمكن لروما

وبَيّس ( بريمر ) أو ولى
وصحنه(هالعلاوي ) فله
يشَدد , يرخي , إعله مهله
نصطبر لا ما نلومه
راح أهج يمكن لروما

لكن يبين نسانه
الخالق, بوكته وبلانه
بطائفيه وحانه مانه
مُقتدى وحارث خصومه
راح أهج يمكن لروما

وطار علاوي برهاوه
وإجو أصحاب الحلاوه
ومن وكتها الكل تساوى
وصارت الدوله غشومه
راح أهج يمكن لروما

وقدمَتْ الشمعه هديه
(الجعفري ) وجانت بليه
كَبْسَلتْ ما نفع بيه
ولا رحمني ( عرك توما ! )
راح أهج يمكن لروما

لإن من يوم التنصَب
هالشفيه كلشي خَرَب
وصارت النسوان تنحَب
وبالوطن تنعك البومه
راح أهج يمكن لروما

وغاب نفط الوطن غازه
وكهربائه أخذت إجازه
وصار هم بالماي عازه
وضَيّع الجاجيك ثومه
راح أهج يمكن لروما

كال حلها بنص لحيتي
الشعب كله عدال بيتي
ومثل ما رحتي إجيتي
بالحجي شفافه لهومه
راح أهج يمكن لروما

وكام بالتلفاز يطلع
ما يفك ياخه ولا يشلَع
حوّل العكروك ضفدع
وحجيه ما ينفهم دومه
راح أهج يمكن لروما

من الحجي كلي شقبضنه
الجوع والارهاب عَضنه
من المشاكل ما غُمَضنه
وما حلت بالعين نومه
راح أهج يمكن لروما

كال صادق صدكينه
وكال مومن وأمنينه
وشلنه عكربنه بدينه
( مفيلح )(2) مكَيّف بحومه
راح أهج يمكن لروما

من سمعته الامل شَمَّعْ
خيطه , والعينين تدمعْ
كَلت خل أكلب لي أنفعْ
صُمت وأفطرت إعله ثومه
راح أهج يمكن لروما

قوي لكن وين قوته ؟
لن شعبنه شبع موته
وكثرت أحزانه وكلومه
راح أهج يمكن لروما

الله والوادم تريده
كال صَرّح للجريده
الكرسي ما يفلت من إيده
حلَف ما يخلف قسومه
راح أهج يمكن لروما

وكلنه بلكت راح يخجلْ
وينسحبْ للشعب أفضلْ
وما درينه الوحي أنزلْ
مهَيء الكرسي لقدومه
راح أهج يمكن لروما

وتالي ما تالي بلادي
كوتها يشك بالرمادي
وشبح التقسيم بادي
ليش أظل ؟ شنهي اللزومه ؟
راح أهج يمكن لروما

وإذا لاموني خوالي
والوطن مَر إعله بالي
أفتح ( المنكوب ) عالي
وأبجي وي نيرون روما
راح أهج يمكن لروما


طين حريlni
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://ibnal3raq.yoo7.com/
 
راح اهج يمكن لروما
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتدى الشعر العراقي :: منتدى الادبي :: منتدى الابوذية والدارمي-
انتقل الى: